"دردشة من الواقع"
بنقابل في حياتنا شخص معين بمواصفات معينه وفي ظروف معينه بيظهر في فتره من حياتنا كلنا تقرييا .. القدر بيرميه في طريقك غصب عنك وبدون اي نية منك ولا منه، ولا بتفكروا انكم تدخلوا في علاقه سوا اوتتعاملوا مع بعض اصلا .. بيحصل حاجه كده ف الاول يمكن بتحس بالانجذاب ناحيته ، بتحس براحه نفسيه الي حد ما ،بس بتكابر ومبتعترفش بكده ،بتبقي اول ماتشوفه عاوز تتخانق معاه او تضربه ، يوم مابتدخل في نقاش معاه مبتتفقوش علي نقطه واحده حتي !
مش عاوووز تظهرله انه صح في أى حاجه حتي لو انت مقتنع بالحاجه دي تماما ... ممكن تكون مبدأ من مبادئك اصلا .
بس من جواك حابب وجوده جدا بيبقي في نزاع جواك من ناحيته ... العلاقه دي بتبقي متعبه اوي .. خناق ، تعب، جنون .
كبريائك وكرامتك بتتملكك في فتره بسيطه من بعد التعارف فبتقرر انك تنهي العلاقه وبسرعه لانك اكبر من انك تتخانق مع حد انت مش مجبر علي التعامل معاه .. صح ؟!
بتبعد فتره جامده عنه.. وانت جواك فرحان بانك اتخلصت منه ،بس اقل حاجه بتفكرك بيه وبكلامه .. لما تقابله تاني صدفه او موقف يجبرك تتعامل معاه تاني .. بتبين انك مضايق جداً من شوفته بس من جواك فرحان .. بتبقي في حاجه من جواك نفسها تتكلم عنك وتقوله وحشتني... وحشني الخناق معاك
و بتضطر انك ترضي نفسك وبرضه مبتجيش على كرامتك .. و بتتقبل انه يدخل حياتك تاني .
علاقتكم مبتختلفش كتير عن الاول .
بس بعد فتره بتتعود عليه جدا و بتبتدي تبينله انك مقتنع بحاجه قالها .. بتتجرأ وتكلمه بدون تلكيك ولا اي حجه .. بتبتدي تقتنع بفكرة انك حابب وجوده .. وهو كمان بيقرب منك وبيحس براحه ناحيتك او بيحسسك بكده الله واعلم باللي جواه ..فبتدور لمبرر جواك ع الشعور ده .. لكن فالواقع مبتلقاش ، بس بتقول دماغنا واحده بتحس ان روحكم متشابهه ... يعني حوارتكم بتكبر شويه شويه وبتبتدوا تدخلوا في حياة بعض وبتحكوا علي كل اللي فيها .. بتتطوروا شويه بشويه وتعترفوا لبعض انكم عزاز علي بعض وحابين وجود بعض بتعترفوا بحاجات من اول ماشوفتوا بعض ...........!!
بس للاسف غالباً بتحصل النهاية الحزينه بتاعت كل قصه واقعيه هي هي الشخص ده بيخزلك، بيتخلي عنك ،ممكن يجي موقف صغير يحسسك انك مش مهم عنده !
بينسحب من حياتك باي شكل من الاشكال مفيش قدامك غير انك تتقبل كده وانت بتضحك وعادي ولا فارقه معاك ! ملكش الحق تتمسك بيه لانه عمره ما كان من حقك اصلا .. فبتفتحله الباب بهدوء ليعود من حيث أتي. وتعود انت لحياتك العاديه و برغم مرارة القسوة لكنك سترجع تدريجيا حتى تتعود.